Поиск

Си гукъеуэхэр фэзмыхьэлIэмэ…


Илъэс зыбжанэ хъуауэ адыгэм ди лъэпкъ ныпым и махуэшхуэр догъэлъапIэр. Къумым итурэ зи Iур игъущыкIа цIыхум псы Iубыгъуэр къызэрыщыхъунум хуэдэущ а махуэр ди лъэпкъым къызэрыщыхъуар. Иужьырей илъэситIым адыгэ ныпым и махуэм Къэбэрдей-БалъкъэрымкIэ сыщымыIэу техуэурэ зэрекIуэкIар си нэгу щIэкIакъым, ауэ дыгъуасэрей махуэр слъэгъуащи сызэгупсысахэр ныфхуэсIуэтыну сыхуейт.

Махуэр къызэрызэрагъэпэщам и гугъу сщIынкъым. Си гукъеуэхэр нэхъыбэу зытеухуар дэращ — адыгэ цIыхухэрщ. Нэхъ тегъэчыныхьауэ жыпIэмэ ди зэхэтыкIэрщ, ныпым ди хущытыкIэрщ.

Ди лъэпкъ дамыгъэм и пщIэр къэтIэтын ипIэкIэ едудыхри абы къыдэкIуэу адыгэр дгъэпудауращ. Республикэ псор къыткIэлъыплъыу гъуэгум щызекIуэ хабзэу щыIэу хъуар ткъутащ, адрей шоферхэм зэран дазэрыхуэхъуам и гугъу сщIыкъым. Куэди къыткIуэцIыхъуэныхьауэ къыщIэкIынщ. Ари къыдолэжь. Полицэ машинэр Iэхъуэ хуэдэу къытхэтын хуей щIэхъуар Iэщ хуэдэу дызэхэтти аращ. Ар содэр щхьэ пщтыр зытIущ къыхэкIатэм, ауэ аракъым, инэхъыбэр хабзэкъутэу щытащ.

Апхуэдиз машинэхэр, ныпхэр щыплъагъум и деж тIэкIу уи лъыр къэплъыну, узэрысыр щIэбгъэпхъуэну къыщIэкIынщ, мыбдеж зы логикэ гуэр щыIэщ. Абы къыхэкIауэ къыщIэкIынщ циркым щыIэм хуэдэу машинэм зыкъыщIырагъэлэлари, ауэ ныпым щимахуэкIэ зи махуэм тIэкIу пщIэ иIэн хуейкъэ? Дапщэрэ ныпыр щIым щылъыу къедгъэIэтыжа. Машинэ абджым алэрыбгъу зэхэушкIумпIам хуэдэу ди лъэпкъ напэр щIытебдзэн щыIэкъым. Ныпыр е къэпщтэхэкъым, е къэпщтамэ лъагэу Iэтауэ боIыгъ… зы бадзэ томыгъэтIысхьэу. Уи нэкIур футбол зэранщIакIуэхэм я маскэхэм хуэдэкIэ щIэбгъэпщкIун щыIэкъым. Зи нэкIур щхьэрыпхъункIэ зыгъэпщкIуу щытар Iей зигу илъыращ. Къамэри къыщIипхым щхьэусыгъуэ иIэн хуейщ. Машинэм фащэ пщыгъыу зыкъибгъэлэлрэ уи къамэр шияуэ ужэкIэ зыри къикIкъым. Куэд пхужыIэнущ мыпхуэдэу…

Пэжым фыхуеймэ автопробег сыкIуэну сыхуеижкъым. Сыгушхуэным ипIэкIэ сызэрынэщхъеяр нэхъыбэщ. Мы дагъуэхэр зыдэслъэгъуахэм зыфхъуэжмэ си гуапэт. Лъэпкъыр дызыкIэлъымыплъыжу хъунукъым.

Дыгъуасэ си закъуэкъым нэщхъеяр, автопробегыр зылъэгъуа нэхъыжь куэдым я гур зэрыузар къызжаIэжащ. Си ныбжьэгъухэми сепсэлъати жысIамкIэ акъылэгъу къыздэхъуащ. Фэри фыкъыздэхъуну сыныволъэIу. Ди ныпым дригушхуэ хъунущ… дригушхуэн хуейщ. Вагъуэхэмрэ шабзэхэмрэ дгъэулъийрэ, удзыфэр фIыцIэ тщIымэ, ди япэ итахэм дахуэмыфащэуращ. Сэ апхуэдэу сыхуейкъым, фэ сщIэкъым…

Адыгэ ныпым теухуауэ дгъэхьэзыра нэтыным феплъымэ ди гуапэщ. Мыр тетхын хуей щIэхъуам и щхьэусыгъуэр ныпым и кIэ нэсу пщIэ зэрыхуэдмыщIыращ. Ныпым и тхыдэми и тхыпхъэми теухуауэ гугъущ щIэуэ зыгуэр жыпIэну, ауэ ди нэхъыжьыфIхэм ныпым къилэжь пщIэм теухуауэ нэтыным щыжаIа псалъэхэм фыщIэгупсысмэ ди лэжьыгъэм мыхьэнэ иIауэ жыпIэ хъунущ:
a_shibzukho.livejournal.com

Добавить комментарий